اعاده ترتيب
كتبت فاتن صلاح
في وقت ما هتكتشفى إنك مش محتاجة تكسبى كل معركة، ولا كل الناس تستحق اهتمامك، ولا شجاعتك في مواجهتهم.. هتلاقي إن فيه ناس ورغم جدعنتهم لكنك إدتيهم أقل من قيمتهم، وناس تانية ماشوفتيش منهم أي خير، وكنتى حاطاهم في مكان عالي واسع عليهم..هتلاقي كمان خطوات مهمة تم تأجليها بدون أسباب، أو خطوات تافهة أخدت الجزء الأكبر من وقتك على الفاضي!.. عشان كده بيبقى مهم كل فترة إنك تعملى إعادة ترتيب للخطوات بناءاً على الأولوية، وللناس بناءاً على مواقفهم معاكى سواء بالدعم، أو التخلّي..فيه حاجات لما بتحصل بتقفل باب بس بتفتح جواكى عين، وفيه ناس كانوا دروس مش أصدقاء، ولا معارف، ولا حبايب.
