أيمن عطاالله ✍️ هنا مصر .. أم الدنيا
ولا ناس في الدنيا بتحب بلدها قد المصريين .. يمكن علشان المصري اتولد وهو سامع اسم مصر قبل ما يتعلم ينطق اسمه .. ويمكن علشان التاريخ هنا مش حكايات في كتب .. لا ده حجر تحت رجلك .. ونيل قدام عينك .. وناس عايشة على نفس الارض بقالها الاف السنين .. المصري لما يقول مصر ام الدنيا مش بيقلل من حد ولا بيعمل نفسه احسن من غيره .. هو بس بيعبر عن علاقة مش سهلة .. علاقة ابن بأمه .. الام ما بتتحبش علشان هي احسن واحدة في الدنيا .. الام بتتحب علشان هي امك وبس .. مصر بالنسبة للمصريين حضن قبل ما تكون حدود وذكريات قبل ما تكون سياسة .. المصري فاهم كويس ان كل بلد ليها تاريخ وكل شعب ليه كرامته بس هو كمان فاهم ان مصر كانت دايما موجودة قبل ما يبقى في مسميات وقبل ما الخرايط تتلون .. مصر شافت حضارات .. قامت ووقعت .. وشافت غزاة مشيوا وفضلت هي واقفة .. المصري لما يقول ام الدنيا هو بيقول ان البلد دي علمت العالم يعني ايه دولة ويعني ايه نهر يعمل حضارة ويعني ايه ناس تعافر وتضحك وتغني وسط التعب .. هو تعبير فيه شجن وحنين اكتر ما فيه غرور .. شجن ابن عارف ان امه تعبانة بس لسه جميلة ولسه قوية ولسه بتدي .. ولما باقي العرب يزعلوا من الجملة يمكن علشان سمعوها بعين المنافسة مش بعين العاطفة لكن لو اتفهمت صح هتبقى جملة حب مش جملة مقارنة .. المصري ما بيقولش مصر ام الدنيا علشان يلغي غيره هو بيقولها علشان يعرف نفسه ويثبت قلبه ويطمن روحه ان البلد اللي اتولد فيها وبيعشقها كبيرة بتاريخها وبناسها وبحكاياتها .. ومهما الدنيا لفّت هتفضل مصر امه وام الدنيا في عينه هو قبل اي حد تاني .. مصر أم الدنيا
