ولا ايه يا حكومه
محمود الدخميسي
كلنا ولاد تسعه وعلي الرزق بنسعي
بس ربك محدد لكل واحد دوره
عداد بيعد. بزياده
شهادات وفاه غير المعتادة
اتشاهد واتوضي يمكن توصل بالسلامه
قالوا شدوا الحزام. للطرق نجددها
خدت من الحور العين 19
19 ورده مفتول عودهم
تشوفهم. العين ترجع وتتاخر
اتشاهد قبل. ماتسافر
ويلموك. إنك علي رزقك بتعافر
ويقولوا مات كافر
وفي الوجع بيماطل
مفيش مسؤول. فيها بيتحاسب
ناس بتتعارك وتتناسب
الموت بايد إللي خلقك
في الأول وفي الآخر
يا مواطن يامطحون. علشان ناسك
شد حزامك من تاني
وجهز نفسك لشهيد تاني
علي طريق الموت المتوارب
واحبس عياطك. علشان هتعيط من تاني
علي حقك المهدور بكلام تافه
سواق مسطول. ورؤية مش منشافه
ومسؤال واخد لقطه علشان أهدافه
هات نفسك واسألها
لحد امتي هنفضل نتاسف
وامورنا. يوم عن يوم بتتعسف
واوجعنا مهجوره بتتكسف
علي كتاف. الحلم المتكتف
علي أربع عجلات مش محكومة
ولا ايه. يا حكومه
كل واحد بيعمل إللي في نفسه
واخد باله بس من نفسه
ملعونه الناس اللي مش معروفة
علي خطوط الموت. المكتوبه
رغم إن الوجع محاوطنا
لكن بيدينا إصرار نبدلها
ترجع وطن. وقانون يحميها